Декабриин арбанда Буряадай толгойлогшо Алексей Цыденов уласай ажаһуугшадаар сэхэ дамжуулгада интернет-сүлжээгээр гараба. Украинын хажууда байһан Курск можодо мүнѳѳ байршаһан сэрэгшэдтэ юундэ уласай түлбэри үгтэнэгүйб гэжэ тэндэ асуудал табигдаба. Түлбэриин хойноһоо хандаһан зондо захирганай байгуулганууд соо Буряадай толгойлогшо Алексей Цыденовай тогтоолыень баримталжа, энэ асуудалай зүбшѳѳрэл үгэнэгүй гэжэ асуудал табигшад хѳѳрэбэ. Тэрэ тогтоолоор тэтхэмжэдэ ганса ДНР, ЛНР, Херсон ба Запоржска можонуудта сэрэг хаажа байһан зон хүртэхэ эрхитэй юм.
- Энэ хадаа үнэхѳѳр шухала асуудал, - гэжэ Алексей Цыденов хэлэбэ. Тэрэ тогтоол гарахада, Курск можо тухай хѳѳрэлдѳѳн үшѳѳ ябаагүй байгаа гэжэ ойлгомжотой (ВСУ-гай дайлан оролго август һара соо болоо һэн). Хамгаалалгын яамантай баримталга бэшэһэн мүн Курск можо ошохо зондо тэтхэмжэ үгэхэбди. Тэндэ баһал дайшалхы ябуулганууд боложо байна ха юм.
Тогтоол руу нэмэлтэнүүдые үнгэрһэн үдэрэй тоогоор оруулха гэжэ республикын толгойлогшо Алексей Цыденов шиидэбэри гаргаа юм.
Һануулая, сэхэ дамжуулгаһаа урид Буряадай толгойлогшо декабриин 7-до пресс-конференци ябуулһан байна. Тэндэ Алексей Цыденов жэлэй дүнгүүд, түсэбүүд, ажамидарал тухай сэтгүүлшэдэй асуудалнуудта харюусаһан байгаа. Теэд тэндэ Буряадай ажаһуугшадтай сэхэ дамжуулга үнгэргэхэ шиидэбэри гаргагдаба. Вторнигой үглѳѳ толгойлогшодо 700 гаран асуудалнууд ябуулагдаһан байгаа. Болбосорол, эрүүл мэндэ, хотын ажамидарал, экологи, унаа гэхэ мэтэ сэдэбүүдээр асуудалнууд ерээ юм.
